Policia e Shtetit ka arrestuar dy vëllezërit të shpallur në kërkim lidhur me ngjarjen e rëndë të rrëmbimit dhe vrasjes së 28-vjeçarit Renis Dobra. Ngjarja kriminale ka ndodhur më 8 korrik në zonën e Ulzës.
Sipas njoftimit të policisë, të arrestuar janë dy shtetasit Kristi Bushgjoka dhe Aleksandër Bushgjoka, ndaj të cilëve ishin lëshuar urdhra ndalimi. Më herët, për këtë ngjarje janë arrestuar edhe Petrit Çakrri dhe Fation Bushgjokaj.
Hetimet kanë zbuluar se dy vëllezërit Bushgjokaj, nga Tropoja dhe që jetonin në Kamëz, si dhe i dyshuari tjetër Çakrri, kishin marrë makina me qira në Tiranë disa ditë para ngjarjes, me qëllim për të humbur gjurmët e tyre. Ata gjithashtu kishin tentuar të çaktivizonin pajisjet GPS të automjeteve, por pa sukses.
Grupi i dyshuar kishte ndjekur lëvizjet e Renis Dobrës për tre ditë të plota në qytetin e Burrelit. Më 8 korrik, ata e rrëmbyen dhe e mbytën atë me litar, duke hedhur trupin e tij në liqenin e Shkopetit.
Ndërsa, njëri prej vëllezërve dyshohet se ka ndihmuar të tjerët të largohen drejt Kosovës pas krimit, ndërsa dy të tjerët akuzohen për pjesëmarrje të drejtpërdrejtë në rrëmbim dhe vrasje.
Njoftimi i Policisë:
Policia e Shtetit
Gjatë 24 orëve të fundit, finalizohet nga Drejtoria e Forcës së Posaçme Operacionale, një tjetër operacion për kapjen e shtetasve në kërkim ndërkombëtar dhe kombëtar.
Operacioni policor i koduar “Operacionalja 68”, u zhvillua në bashkëpunim me Forcën Speciale RENEA.
Kapen në Tiranë dhe vihen në pranga 2 vëllezërit e njërit prej autorëve të vrasjes nëpërmjet strangulimit, të shtetasit R. D., më datë 08.07.2025, në Burrel.
Të arrestuarit, të dyshuar si bashkëpunëtorë për rrëmbimin dhe mbajtjen peng të shtetasit R. D.
Në vijim të punës për lokalizimin, kapjen dhe arrestimin e shtetasve të shpallur në kërkim ndërkombëtar dhe kombëtar, shërbimet e Drejtorisë së Forcës së Posaçme Operacionale në DPPSh siguruan informacion për vendndodhjen e 2 vëllezërve të shpallur në kërkim.
Bazuar në këtë informacion, u organizua dhe u zhvillua në bashkëpunim me shërbime të Forcës Speciale RENEA, operacioni i koduar “Operacionalja 68”, për kapjen e tyre. Gjatë operacionit, shërbimet e Policisë kapën në një apartament në Tiranë dhe ndaluan shtetasit:
-K. B., 29 vjeç dhe A. B., 24 vjeç, vëllezër.
Këta shtetas ishin shpallur në kërkim bazuar në vendimin e Gjykatës së Shkallës së Parë të Juridiksionit të Përgjithshëm Dibër, si të dyshuar për veprën penale “Rrëmbimi ose mbajtja peng e personit”, kryer në bashkëpunim.
Nga hetimet dyshohet se 2 të ndaluarit, në bashkëpunim me vëllanë e tyre, shtetasin F. B., dhe me shtetasin P. H. alias P. C., 55 vjeç (të arrestuar për veprat penale “Vrasja me paramendim”, kryer në bashkëpunim, dhe “Rrëmbimi dhe mbajtja peng e personit”), kanë rrëmbyer dhe mbajtur peng shtetasin R. D., 23 vjeç, trupi i pajetë i të cilit u gjet në liqenin e Ulzës, Shkopet.
2 shtetasit e kapur iu dorëzuan Drejtorisë Vendore të Policisë Dibër, për veprime të mëtejshme.
