Është zbardhur dëshmia e Marian Kodhelit, 25 vjeç, i cili mesditën e djeshme vrau me thikë babain e tij, Pjetër Kodheli, në Durrës. Pas krimit, i riu u arrestua dy orë më vonë në zonën e plazhit, ku ishte përpjekur të fshihej përkohësisht.
Gjatë marrjes në pyetje, 25-vjeçari ka deklaruar se veprimin e ndërmori pas një debati me të atin, duke pretenduar se ai e “stresonte dhe nuk e linte të qetë”.
“Isha duke ngrënë bukë në drekë dhe babai mu turr, s’po më linte rehat. Nuk e mbaj mend saktësisht çfarë më tha, por mora thikën dhe e qëllova. Kemi patur grindje të vazhdueshme që kur jam kthyer nga Greqia, para 6 muajsh,” mësohet të ketë thënë ai para hetuesve.
Sipas burimeve nga grupi hetimor, Marian Kodheli kishte jetuar për disa vite jashtë vendit, fillimisht në Francë për rreth 6 vjet, më pas në Greqi, nga ku ishte kthyer në Shqipëri gjashtë muaj më parë.
Familjarë të autorit kanë deklaruar se dy vite më parë ai është vizituar në spital, ku një mjeke e ka këshilluar të kontrollohej tek një psikiatër. Megjithatë, as ai dhe as familjarët nuk e kanë ndjekur këtë rekomandim, duke përjashtuar mundësinë që ai të kishte probleme të shëndetit mendor.
Burime pohojnë se edhe babai i tij kishte qenë kundër që i biri të kryente këtë vizitë.
Grupi hetimor po vijon punën për të zbardhur rrethanat e plota të ngjarjes, ndërsa 25-vjeçari pritet të dalë para gjykatës për caktimin e masës së sigurisë në ditët në vijim.
