John Kerry ka deklaruar se Benjamin Netanyahu u ka bërë vazhdimisht presion presidentëve amerikanë për të goditur Iranin, por vetëm Donald Trump ka rënë dakord.
Ish-sekretari amerikan i Shtetit tha se kryeministri izraelit u kishte kërkuar në mënyrë të përsëritur administratave amerikane që të ndërmerrnin sulme ushtarake ndaj Iranit, por presidentët e mëparshëm e kishin refuzuar këtë kërkesë.
Në një intervistë në emisionin “The Briefing with Jen Psaki”, Kerry u shpreh se kishte marrë pjesë në shumë diskutime me Netanyahun: “Ai donte që ne të godisnim.”
Sipas Kerry-t, lideri izraelit ia kishte paraqitur këtë propozim drejtpërdrejt ish-presidentit Barack Obama, por ky i fundit e kishte refuzuar. Po ashtu, ai tha se edhe Joe Biden dhe George W. Bush kishin refuzuar një veprim të tillë.
“Presidenti i vetëm që ka rënë dakord për këtë, padyshim, është presidenti Trump,” tha Kerry.
Duke iu referuar raportimeve të fundit, Kerry shtoi se Netanyahu kishte paraqitur një argumentim të detajuar për ndërhyrje ushtarake, të cilin e përshkroi si “një plan me katër pika”.
Sipas tij, propozimi përfshinte pretendime se një sulm mund të “eliminonte udhëheqjen… të nxiste ndryshim regjimi… dhe të shkatërronte ushtrinë”.
Kerry theksoi se raportimet mbi këto diskutime duken të besueshme dhe shtoi se këto argumente janë paraqitur në takime ku merrnin pjesë zyrtarë të lartë, ku janë shqyrtuar edhe qëndrime të ndryshme.
