Ish-presidenti i Francës, Nicolas Sarkozy, është duke vuajtur një dënim prej pesë vjetësh, pasi hyri sot në burgun “La Santé” në Paris. Ai u largua nga shtëpia e tij në 09:15 të mëngjesit, i shoqëruar nga bashkëshortja e tij Carla Bruni. Më parë, rreth shtëpisë së tij u mblodhën qindra mbështetës, përfshirë familjarë dhe miq, që këndonin himnin kombëtar “Marseljeza” për të shprehur mbështetje ndaj Sarkozy-t.
Djali i tij, Louis, shpalli thirrjen për mbledhje në rrjetet sociale, duke ftuar ata që donin të tregonin dashurinë dhe respektin për babain e tij. Sarkozy është dënuar për “asociim kriminal” në lidhje me financimet libiane të fushatës së tij presidenciale të vitit 2007. Ndërkohë, presidenti aktual Emmanuel Macron, i cili është përballur me kritika për mbështetje, e takoi Sarkozy-n në Elize për të shprehur solidaritetin njerëzor në këto momente të vështira.
Dhe megjithëse ka marr një dënim, Sarkozy hyn në burg me statusin e “pafajshëm” teksa pret apelimin. Pritet që ai të qëndrojë në burg për disa javë përpara se të transferohet në arrest shtëpie, për shkak të moshës së tij prej 70 vjetësh dhe gjendjes shëndetësore. Ai do të qëndrojë në një qeli 11 metra katrorë dhe do të jetojë në izolim për arsye sigurie, me fqinjë të dënuar për krime të rënda si terrorizmi.
Sarkozy do të ketë një televizor dhe një orë shëtitje në ditë, por ndalimi i celularëve do ta mbajë të izoluar nga bota e jashtme. Ai ka një listë sendesh të lejuara, përfshirë një shall dhe mjete kuzhine, dhe do të ketë mundësi për tre takime në javë me familjarë dhe miq. Në fillim të qëndrimit të tij në burg, Sarkozy ka vendosur të marrë me vete dy libra, “Konti i Monte Kristos” dhe një biografi për Jezusin, duke shprehur ndjeshmëri dhe humor për situatën e tij.
