Disa media arabe kanë raportuar se gjenerali i forcave speciale të Gardës Revolucionare të Mbrojtjes Islamike, Esmail Qaani, është ekzekutuar pasi dyshohej për spiunazh në favor të Mossad.
Sipas portalit nga Emiratet e Bashkuara Arabe The National, i cili citon burime të pakonfirmuara, Qaani u akuzua për spiunazh dhe më pas u ekzekutua. Megjithatë, deri tani nuk ka asnjë konfirmim zyrtar për këtë informacion.
Esmail Qaani ishte komandanti i njësisë elitë Quds Force, një strukturë e rëndësishme e Gardës Revolucionare iraniane. Ai ka mbijetuar më parë disa tentativa për atentat dhe, sipas raportimeve, ndodhej pranë liderit suprem iranian Ali Khamenei edhe gjatë bombardimeve amerikano-izraelite.
Gjenerali iranian është zhdukur disa herë nga skena publike gjatë viteve të fundit. Një nga rastet më të përfolura ishte pas sulmeve izraelite në Bejrut në vitin 2024, kur për një periudhë nuk pati asnjë informacion për vendndodhjen e tij, përpara se të shfaqej sërish në publik.
Deri më tani, autoritetet në Iran nuk kanë reaguar zyrtarisht ndaj këtyre raportimeve, ndërsa informacioni mbetet i pakonfirmuar.
