Interi i Chivu-t vazhdon marshimin drejt kreut me një fitore bindëse 3–0 ndaj Fiorentinës në “San Siro”. Pas një ore rezistence nga Viola, zikaltërit shpërthyen në vetëm gjashtë minuta:
në të 66’-ën, Hakan Calhanoglu zhbllokoi rezultatin me një goditje të fortë diagonale, ndërsa në të 71’-ën, Luka Sucic ndriçoi stadiumin me një lëvizje magjike dhe finalizim elegant që kujtoi ditët më të mira të Zidane-it.
Në minutën e 88’, turku vulosi rezultatin nga pika e bardhë, duke shënuar dopietën personale dhe konfirmuar veten si specialist absolut i penalltive (26 gola nga 27 tentativa për Interin).
Fiorentina, pa fitore në nëntë ndeshje dhe me vetëm katër pikë, po përjeton fillimin më të dobët në historinë e saj. Edhe pritjet e De Gea-s nuk mjaftuan për të shmangur katastrofën, ndërsa Viti u përjashtua në fund me të kuq.
Tifozët zikaltër shpërthyen në festë, ndërsa në kor ironik kënduan “Pioli is on fire”, tashmë jo si himn triumfi, por si simbol i një trajneri në rënie të lirë.
