Kreu i PD, Sali Berisha, reagoi sot për inaugurimin e rrugës Qukës-Qafë Plloçë, duke e quajtur një nga veprat publike më të shtrenjta dhe të abuzimeve të mëdha financiare.
“Rruga, që duhej të përfundohej në vitin 2014, u inaugurua pas 16 vitesh. Në këtë vepër publike u vodhën rreth 180 milionë euro,” shkroi Berisha në rrjetet sociale. Ai komentoi edhe mbi ministresën e Infrastrukturës, Belinda Balluku, duke thënë se gjatë inaugurimit ajo “këndonte e ekzaltuar: ‘Bjeri gajdes gajdexhi, se mbushëm xhepat tona’”.
Sipas Berishës, projekti filloi më 26 qershor 2009 me financim prej 73 milionë eurosh nga Banka Islamike dhe duhej të përfundonte brenda vitit 2014, përfshirë tunelin në Qafë Plloçë. Ndryshimet e mëvonshme dhe keqmenaxhimi e çuan koston në mbi 260 milionë euro.
Rruga, me gjatësi 43 km, ndjek pjesërisht gjurmët e rrugës së lashtë “Egnatia”, shkurton distancën Korçë-Tiranë dhe urbanizon krahinën e Mokrës.
