Ish-presidenti i Shqipërisë Ilir Meta ka dhënë së fundmi një intervistë nga qelia, ku ka folur për gjendjen e tij dhe se si po i kalon këto ditë të nxehta vere.
Meta tha se i vetmi problem është tensioni, që po i qëndron 7/11, ndërkohë që ambienti i qelisë është palestër, kuzhinë dhe studio.
Ai shtoi se vitet e tjera në këtë periudhë ishte duke ngjitur dhe promovuar malet e Shqipërisë, ndërsa në qeli po bën stërvitje për të ngjitur majën e hekurave dhe për të dalë jashtë.
“Asnjëherë më mirë nuk kam qenë me shëndet dhe në formë fizike. I vetmi ‘’problem’’ është se tensioni gjithmonë është 7–11, si në kulmin e dimrit, por edhe të verës. Këto 12 m2 janë edhe palestër edhe bibliotekë edhe studio edhe kuzhinë, pra zakonisht unë në këtë periudhë kam qenë në zonat më malore të vendit duke i eksploruar dhe promovuar ato. Por nuk më mungojnë as këtu. Qelia, harrova të them se, është edhe ekspozitë me fotot e mia në majën e Jezercës, në Dobërdol, Korab, Theth, Shalë, Prevallë, Majën e Çikës, etj. Ndërkohë, stërvitem çdo ditë për të ngjitur Majën e Hekurave sa më parë”, tha Meta.
