Kevin Hajrulla, 30 vjeç, i cili u plagos rëndë në një atentat të armatosur më 18 dhjetor 2024 në lagjen “24 Maji” të Vlorës, ka dhënë dëshminë e tij para policisë, ndërkohë që ndodhet i shtruar në spitalin e Tiranës për mjekim.
Hajrulla, i cili ishte qëlluar me mbi 50 plumba ndërsa po udhëtonte me automjetin e tij Mercedes Benz, ka deklaruar se nuk ka asnjë dijeni për autorët dhe ngjarjen e ndodhur. Ai tha se nuk ka pasur konflikte me asnjë person dhe nuk është në gjendje të kujtojë momentin e sulmit. “Jam i traumatizuar dhe nuk mbaj mend asgjë”, ka thënë ai gjatë marrjes në pyetje, duke shtuar se nuk ka parë as persona në momentin e atentatit.
Në lidhje me marrëdhënien e tij me Inez Hajrullën, një personazh i njohur në Vlorë, Hajrulla ka pohuar se janë kushërinj, por se e ka takuar rrallë.
Për shkak të plagëve të shumta, Hajrulla ka kaluar 3 ndërhyrje kirurgjikale për heqjen e predhave dhe ka nevojë për ndërhyrje të tjera. Gjendja e tij është ende e rëndë, por mjekët janë optimistë për shërimin e tij.
Grupi hetimor po heton përmes kamerave të sigurisë, por ende nuk ka asnjë informacion për identitetin e autorëve të atentatit. Dëshmitë e Hajrullës nuk kanë sjellë ndihmë të dukshme në hetim për shkak të gjendjes së tij të traumatizuar.
