Ka rënë në prangat e Policisë së Krujës, Ariel Rraja, nipi i ish-deputetit të Partisë Socialiste, Rahman Rraja.
Përmes një njoftimi zyrtar Policia e Shtetit bën me dije se Ariel Rraja, djali i Flamur Rrajës është arrestuar ditën e djeshme pasi theu masën “arrest shtëpie”.
Gjykata e Tiranës i ka caktuar 24-vjeçarit masën e sigurisë “arrest me burg” për veprën penale “Largimi i të burgosurit nga vendi i qëndrimit”.
Gjithashtu efektivët kanë proceduar penalisht 56-vjeçarin Flamur Rraja dhe të riun me ininciale E.T, pasi kanë kundërshtuar punonjësit e Policisë gjatë arrestimit të 24-vjeçarit.
“Specialistët e Seksionit për Hetimin e Krimeve të Komisariatit të Policisë Krujë ndaluan shtetasin e shpallur në kërkim A. Rr., 24 vjeç, të cilit Gjykata e Tiranës i ka caktuar masën e sigurisë “Arrest në burg”, për veprën penale “Largimi i të burgosurit nga vendi i qëndrimit”.
Në vijim të veprimeve për këtë rast, janë proceduar penalisht shtetasit F. Rr., 56 vjeç dhe E. T., 26 vjeç, pasi kanë kundërshtuar punonjësit e Policisë, gjatë ndalimit të 24-vjeçarit, dhe nuk iu janë bindur urdhrit të tyre, për shoqërimin në komisariat”, njofton Policia.
Ariel Rraja, ishte protagonist i një sherri në tetor të vitit 2024, në zonën e Niklës në Fushë-Krujë, teksa dhunoi djalin e familjes Caca, për një kanal uji. Një sherr u përfshi edhe babai i të riut Kujtim Caca, si dhe i ati i Arielit, Flamur Rraja. Aso kohe babë e bir u shpallën në kërkim, ndërkohë Gjykata më pas vendosi masën e sigurisë “arrest shtëpie” për 24-vjeçarin.
