Një ngjarje dramatike ka ndodhur gjatë një fluturimi nga Omaha drejt Detroit-it, kur një pasagjer shqiptar tentoi të hapte derën e emergjencës në mes të fluturimit, duke detyruar pilotin të bëjë një ulje urgjente.
Personi në fjalë është identifikuar si Mario Nikprelaj, 23 vjeç, banues në Nebraska. Ai ishte pasagjer në fluturimin 3612 të Delta Connection, i operuar nga SkyWest Airlines. Sipas autoriteteve, gjithçka nisi pas një debati verbal mes të riut dhe një prej asistenteve të fluturimit. Më pas, Nikprelaj u përpoq të hapte derën e avionit, duke shkaktuar panik në bord.
Avioni u detyrua të devijonte rrugën dhe të bënte ulje të menjëhershme në Aeroportin Lindor të Ajovës, ku forcat e policisë së Cedar Rapids ndërhynë menjëherë. 23-vjeçari u arrestua në vend dhe u dërgua në Qendrën Korrektuese të Qarkut Linn. Ai përballet me disa akuza, përfshirë sjellje të çrregullt, sulm fizik, posedim të barnave me recetë dhe ngacmim të shkallës së parë.
Pasi situata u vu nën kontroll, avioni rifilloi fluturimin dhe mbërriti në destinacion me një vonesë prej rreth 90 minutash.
Hetimet vazhdojnë, ndërsa autoritetet amerikane pritet të japin më shumë informacion mbi gjendjen psikologjike dhe motivet që çuan në këtë sjellje të rrezikshme. Ngjarja ka marrë vëmendje të gjerë në mediat lokale.
