Aktorja e njohur Eni Jani ishte e ftuar në programin “Interview” të Mirela Milorit në Euronews Albania, ku ndau me publikun një nga periudhat më të vështira të jetës së saj. Ajo foli për sfidën e madhe që përjetoi kur bashkëshorti i saj, Genci Fuga, pati probleme serioze shëndetësore.
Gjatë intervistës, Jani rrëfeu se si arriti të ruante qetësinë dhe përqendrimin, duke ndihmuar jo vetëm bashkëshortin, por edhe veten për ta përballuar situatën.
“Kam marrë gjërat hap pas hapi. Jam përpjekur të ruaj qetësinë dhe mendoj se e kam bërë ashtu si duhet. Nuk kam qenë problematike për mjekët; kam ruajtur qetësinë edhe te ata. Unë nuk doja që ata të më qetësonin mua, por të kuptoja çfarë po ndodhte. Ishte një shok shumë i madh,” tha aktorja.
Edhe pse e përshkroi veten si një person shumë të ndjeshëm dhe emocional, Jani zbuloi se në situata të vështira ajo gjen forcën për të qëndruar e fortë. “Unë jam shumë e ndjeshme si natyrë, por në situata të tilla më jep Zoti forcë,” tha ajo.
Jani tregoi gjithashtu për momentet pranë bashkëshortit të saj gjatë ndërhyrjes dhe periudhës së rikuperimit.
“Kam kaluar një ditë të tërë pranë Gencit. Nga ora 11 e paradites deri në orën 10 të mbrëmjes unë vetëm i flisja. Kur ai më shikonte lumturohesha. Gjatë gjithë kohës nuk i jam ndarë, sepse doja të isha pranë tij,” shtoi ajo.
