Është kryer riatdhesimi i parë nga Qendra e Riatdhesimit në Gjadër, duke shënuar një moment të rëndësishëm në zbatimin e marrëveshjes së bashkëpunimit mes Italisë dhe Shqipërisë për menaxhimin e emigracionit të parregullt.
Personi i riatdhesuar është një 42-vjeçar nga Bangladeshi, i cili kishte hyrë në Itali në vitin 2009. Ai ishte vendosur në qendrën në Gjadër pas vendimit të autoriteteve italiane për dëbimin e tij, për shkak të rrezikut të lartë shoqëror që përfaqësonte. Sipas burimeve zyrtare, ai ka qenë më parë i dënuar për disa vepra penale, përfshirë edhe një rast të rëndë të dhunës në familje.
Pas përfundimit të procedurave ligjore dhe periudhës së qëndrimit në strukturën në Gjadër, ai është deportuar drejt vendit të tij të origjinës.
Lidhur me këtë zhvillim, Ministri i Brendshëm italian, Matteo Piantedosi, ka reaguar përmes një postimi në platformën “X”, ku e cilëson operacionin si një hap domethënës në luftën ndaj emigracionit të paligjshëm.
“Riatdhesimi i parë nga Shqipëria i një shtetasi të huaj nga Qendra e Riatdhesimit në Gjadër. Këto operacione do të vazhdojnë edhe në ditët në vijim, në përputhje me strategjinë qeveritare për një veprim më të efektshëm ndaj imigracionit të jashtëligjshëm”, – deklaroi ministri Piantedosi.
