GJKKO ka lënë në burg 31-vjeçarin Juxhin Koka, i cili u ekstradua nga Spanja, pasi SPAK e akuzon se ka korruptuar me 10 mijë euro punonjësin e policisë dhe ka vjedhur bashkë me disa persona të tjerë 200 mijë litra naftë nga një anije që ishte ankoruar në portin e Durrësit.
Ndaj Juxhin Kokës tij ishte caktuar masa sigurisë “Arrest në burg”, për veprat penale Korrupsioni aktiv i personave që ushtrojnë funksione publike, kontrabanda me mallra të akcizës ose me pezullim të detyrimeve doganore dhe vjedhja, kryer në bashkëpunim.
Sipas hetimeve nga SPAK, ka rezultuar se Juxhin Koka dhe Drilon Malluta, i ofruan 10 mijë euro ryshfet punonjësit të policisë Armand Marvataj, me qëllim që ky i fundit të lejonte nxjerrjen e paligjshme të naftës së sekuestruar nga anija, më 27.1.2025. Mbrëmjen e po asaj date, në bashkëpunim me anëtarët e ekuipazhit, nafta u transportua ilegalisht jashtë anijes, pavarësisht se ajo ishte nën sekuestrim të vendosur më 12 janar, gjatë operacionit të koduar “Ari i zi”, nga Drejtoria Vendore e Policisë Durrës.
Gjatë kontrollit në banesën e efektivit të policisë, Armand Marvataj, është sekuestruar edhe shuma prej 10.000 euro, e konsideruar provë materiale e veprës penale të korrupsionit.
Sipas njoftimit zyrtar, “Prokuroria e Posaçme (SPAK), më datë 23 tetor 2025, paraqiti në gjykatë kërkesën me objekt verifikimin e kushteve të zbatimit të masës së sigurimit dhe nevojës për vazhdimin e saj. Organi i akuzës kërkoi që ndaj të pandehurit Koka të vijojë të zbatohet masa e arrestit në burg, e parashikuar nga neni 238 i Kodit të Procedurës Penale.
Pas shqyrtimit të kërkesës, Gjykata e Posaçme e Shkallës së Parë për Korrupsionin dhe Krimin e Organizuar, me trup gjykues të kryesuar nga gjyqtarja Rudina Palloj, në bazë të neneve 112, 248, 228, 229 dhe 230 të Kodit të Procedurës Penale, me vendimin nr. 110, datë 24.10.2025, vendosi:
Vazhdimin e masës së sigurimit “arrest në burg” për të pandehurin Juxhin M. Koka, të akuzuar për kryerjen e veprave penale:
-“Kondrabandë për mallrat për të cilat paguhet akcizë, ose me pezullim të plotë apo të pjeshëm nga detyrimet doganore ose të akcizës”,
-“Korrupsioni aktiv i personave që ushtrojnë funksione publike”, dhe
-“Vjedhja”,
të gjitha të kryera në bashkëpunim, parashikuar nga nenet 172/3 e 25, 244/2 e 25, dhe 134/3 e 25 të Kodit Penal.”
