Pas humbjes 2-0 ndaj Anglisë në “Wembley”, trajneri Sylvinho e konsideron rezultatet të pranueshëm. Në një deklaratë pas ndeshjes, braziliani që drejton Kombëtaren shqiptare theksoi se përballë një rivali të këtij niveli mund të ndodhin edhe humbje më të thella.
“Anglia është një nga ekipet më të forta, me dy mbrojtës qendrorë shumë të fortë. Kjo ishte vetëm ndeshja e parë. Nuk është e lehtë të shkosh në Wembley dhe të fitosh. Këtu luajnë lojtarët më të mirë të botës, është një sfidë shumë e vështirë. Jam i lumtur dhe krenar për gjithë lojtarët që dolën në fushë. Nëse nuk shkon në fushë i organizuar, mund të pësosh edhe 5 gola,” tha Sylvinho.
Tekniku i Shqipërisë gjithashtu analizoi lojën e ekipit, duke vlerësuar ndihmën që dha Armando Broja, i cili kontribuoi në ofensivën kuqezi për 30 minuta, si dhe Myrto Uzuni, që startoi si titullar.
“Në pjesën e dytë luajtëm më mirë. Kur Broja hyri në lojë, bëri një punë të mirë. Atëherë mund të kishim arritur në barazim, por ata shënuan golin e dytë dhe humbëm. Nëse nuk përgatit mirë 45 minutat e para, përfundon keq. Kishim vështirësi për të bërë presing ndaj kundërshtarit. Vetëm Uzuni mund të shfrytëzojë hapësirat. Gabimet në pasimin e parë për të dalë nga zona ishin të pranishme. Kur kalon presingun që bëjnë anglezët, mund të rrezikosh,” shtoi ai.
Mbrojtësit e krahut, Ivan Balliu dhe Naser Aliji, të cilët u rikthye si titullar, gjithashtu morën vlerësime nga trajneri.
“Nga ana tjetër, Anglia është një skuadër teknike fantastike, shumë e fortë. Ishte e vështirë për mbrojtësit e krahut. Aliji po luan si mbrojtës qendre, jo krah te Dinamo, por këtu ka luajtur shpesh në krah. Dua t’i bëj komplimente për paraqitjen e tij shumë të mirë. Po ashtu, edhe Balliu, i cili erdhi pa luajtur shumë minuta, u përball me Rashford dhe e bëri një punë të mirë,” përfundoi Sylvinho.
