Një ngjarje e rëndë ka tronditur qytetin e Lezhës mbrëmjen e së martës, ku një 42-vjeçar, me iniciale A.M., u gjet pa shenja jete në ambientet e dyqanit të tij të veglave të punës, në lagjen Gurra. Sipas informacioneve paraprake nga policia, në trupin e tij nuk janë konstatuar shenja dhune, ndërsa dyshohet se humbja e jetës ka ardhur për shkaqe natyrale.
Lajmi për vdekjen e 42-vjeçarit ka shkaktuar tronditje të madhe në familje dhe në komunitetin lokal. Pas marrjes së këtij njoftimi, nëna e tij, një grua 72-vjeçare me iniciale P.M., është gjetur pa shenja jete në banesën e saj në fshatin Lalm i Ri, në Lezhë. Familjarët kanë qenë ata që kanë konstatuar ngjarjen dhe kanë njoftuar autoritetet.
Burime zyrtare bëjnë me dije se dyshohet që gruaja të ketë qenë në një gjendje të rënduar emocionale pas humbjes së të birit. Megjithatë, shkaqet e sakta të vdekjes së saj do të përcaktohen vetëm pas përfundimit të ekspertizës mjekoligjore.
Policia njofton se trupat e pajetë të nënë e bir janë dërguar në Institutin e Mjekësisë Ligjore në Tiranë, ku po kryhen ekzaminimet përkatëse për të sqaruar plotësisht shkaqet e humbjes së jetës. Ndërkohë, grupi hetimor vijon punën për zbardhjen e rrethanave të kësaj ngjarjeje të rëndë, e cila ka lënë të pikëlluar familjarët dhe banorët e zonës.
