Një dyqan në Kaliforni është grabitur nga katër persona që kanë marrë mallra me vlerë mijëra dollarësh, përfshirë edhe kukullat e famshme “Labubu”.
Kamerat e sigurisë kapën momentin e hyrjes me forcë të grabitësve, të cilët shkatërruan tri prej kamerave dhe u larguan me kutitë që përmbanin produktet më të kërkuara. Bashkëpronarja e dyqanit “One Stop Sales”, Joanna Aventano, tha se dëmi i shkaktuar mund të arrijë në rreth 30,000 dollarë, ndërsa e përshkroi ngjarjen si zhgënjyese, duke theksuar se ata kishin punuar shumë për të ngritur biznesin.
Pronarja dyshon se grabitësit kishin ndjekur llogarinë e dyqanit në rrjetet sociale, pasi vetëm pak kohë më parë ishte njoftuar një dërgesë e re me kukullat Labubu, të cilat zakonisht shiten menjëherë. Policia raportoi se grabitja ndodhi në orën 01:29 të mëngjesit të së mërkurës dhe se automjeti i përdorur nga hajdutët u gjet i braktisur pak më vonë. Vlera e kukullave të vjedhura mendohet të jetë rreth 7,000 dollarë, por shuma mbetet e paqartë për shkak të ndryshimeve në çmime mes shitjes me pakicë dhe tregut të rishitjes.
Në faqen zyrtare të dyqanit, disa nga kukullat shiten deri në 500 dollarë për copë, ndërsa në tregun sekondar çmimet janë edhe më të larta. Kërkesa e madhe për këto lodra ka nxitur gjithashtu krijimin e një tregu të zi, ku qarkullojnë edhe shumë falsifikime.
Kukullat Labubu prodhohen ekskluzivisht nga kompania Pop Mart dhe kanë fituar popullaritet global vitet e fundit. Ato janë bërë veçanërisht të famshme pasi figura si Rihanna janë fotografuar me to, duke i kthyer në objekt dëshire për koleksionistët dhe grabitësit.
