Pas një ndjekjeje si në filma, e cila zgjati pothuajse dy orë, policia e Tiranës ka vënë në pranga dy persona, të cilët qarkullonin me një automjet në vjedhur. Gjatë kontrollit, policia i gjeti kokainë dhe armë të ftohtë.
Sipas njoftimit të uniformave blu, drejtuesi i automjetit (shtetas i shpallur në kërkim) nuk iu bind urdhrit të punonjësve të Policisë, për të ndaluar por në tentativë për t’u larguar përplasi një automjet policie.
Nga përplasja, janë dëmtuar lehtë 2 punonjësit e Policisë.
Në pranga kanë rënë shtetasit E. Z., 50 vjeç, banues në Tiranë, i shpallur në kërkim për disa vjedhje dhe E. T., 37 vjeç, banues në Tiranë.
Nga hetimet dyshohet se shtetasi E. Z., në bashkëpunim me shtetasin E. T., gjatë periudhës shkurt-prill 2025, ka kryer vjedhje të ndryshme në Tiranë, Krujë, Elbasan, Shijak dhe Klos.
Mjeti me të cilin qarkullonin, sasia e lëndës narkotike kokainë e gjetur në makinë si dhe arma u sekuestruan në cilësinë e provës materiale.
