Një biznes në afërsi të Lushnjës ka rënë pre e hajdutëve. Burime për mediat bëjnë me dije se përgjatë natës hajdutët janë futur në një dyqan thertore dhe kanë vjedhur kasafortën.
Më pas ata kanë marrë dhe një nga furgonat e kompanisë për tu larguar nga vendi i ngjarjes. Mirëpo, gjatë largimit, hajdutët kanë humbur kontrollin e mjetit dhe si rrjedhojë kanë rënë në kanalin kullues.
Burime për mediat bëjnë me dije se pas këtij aksidenti ata kanë arritur të largohen sërish.
Mësohet se pasi furgoni me të cilin po largoheshin ka rënë në kanal në dalje të fshatit Golem i vogël drejt autostradës, autorët janë larguar me një tjetër mjet dhe sipas burimeve nga policia kanë dalë në autostradën Lushnje-Rrogozhinë.
Ndërkohë, policia ndodhet në vendin e ngjarjes dhe po punon për zbardhjen e plotë të këtij rasti si dhe identifikimin dhe kapjen e autorëve.
Grupi hetimor ka sekuestruar edhe pamjet filmike nga kamerat e sigurisë së bizneseve për të gjetur dhe për të zbardhur dinamikën e ngjarjes si dhe për të zbuluar se me çfarë mjeti shkuan autorët për të kryer vjedhjen.
