Manchester City dhe sulmuesi i tyre kryesor, Erling Haaland, po kalojnë një nga sezonet më të vështira në vitet e fundit, me rezultatet dhe performancat që lënë shumë për të dëshiruar.
City ka arritur vetëm një fitore në 12 ndeshjet e fundit në të gjitha kompeticionet, duke përjetuar një krizë të thellë forme. Haaland, i cili e nisi sezonin në mënyrë mbresëlënëse me 10 gola në 5 ndeshjet e para të Premier League, ka shënuar vetëm 3 herë që nga gushti.
Pas humbjes 2-1 kundër Aston Villa të shtunën, sulmuesi norvegjez pranoi se performanca e tij ka qenë larg pritshmërive dhe se duhet të bëjë më mirë.
ÇFARË THA HAALAND?
Duke folur për TNT Sports, Haaland tha:
“Së pari, shoh veten time. Nuk kam bërë gjërat mirë, nuk i kam shfrytëzuar rastet që kam pasur. Duhet të përmirësohem, nuk kam qenë i mirë mjaftueshëm. Sigurisht, besimi ynë nuk është në nivelin më të mirë. E dimë sa i rëndësishëm është besimi dhe ai ndikon te çdo njeri. Duhet të vazhdojmë dhe të qëndrojmë pozitivë, edhe pse është e vështirë.”
GUARDIOLA MBROHET NGA KRITIKAT
Ndërkohë që Pep Guardiola është vënë nën presion të madh për rezultatet e dobëta, Haaland vazhdon ta mbështesë trajnerin spanjoll. Ai deklaroi:
“Ai ka fituar Premier League gjashtë herë në shtatë vite, kështu që këtë nuk do ta harrojmë kurrë. Ai do t’i gjejë zgjidhjet. E ka bërë këtë çdo vit. Ne ende besojmë tek ai, dhe tani duhet të punojmë më shumë se kurrë.”
ÇFARË PRET HAALAND?
Haaland dhe Manchester City do të jenë në fushë sërish në Boxing Day, kur presin Everton në Etihad Stadium. Sulmuesi norvegjez do të kërkojë të përmirësojë performancën e tij dhe të ndihmojë skuadrën të kthehet te fitoret.
