Në Gjirokastër, është identifikuar vatra e parë e gripit të shpendëve. Sipas informacionit të mjekëve veterinerë, 20 pula në fshatin Valare janë groposur pas konstatimit të shenjave të sëmundjes.
Dyshimet e para për gripin u ngritën nga vetë banorët e zonës, të cilët, pasi vërejtën ngordhjen e disa pulave, lajmëruan menjëherë sektorin e veterinarisë.
Mjeku veteriner Krenar Veliu, i cili udhëhoqi ekipin e shërbimit veterinar në terren, shpjegoi hapat që u ndoqën për trajtimin e rastit. Sipas tij, informimi erdhi nga një fermer i cili vuri re ngordhjen e disa pulave. “Ditën e premte, kemi marrë informacionin nga fermeri që kishte ngordhur disa pula. Së bashku me ekipin shkuam në terren, dyshuam për gripin e shpendëve, morëm mostra dhe pulat e tjera i groposëm, siç kërkon ligji. Ditën e shtunë, rezultoi që ngordhja ishte shkaktuar nga gripi i shpendëve,” tha Veliu.
Mjekët veterinerë apeluan për një kujdes të shtuar nga fermerët dhe komunitetin në përgjithësi, për parandalimin dhe identifikimin e rasteve të mundshme të gripit të shpendëve. Ata theksuan rëndësinë e bashkëpunimit me kryepleqtë e fshatrave dhe njësitë administrative, të cilat duhet të njoftojnë menjëherë për çdo shenjë të dyshuar sëmundjeje. “Gripi i shpendëve është një sëmundje që mund të përhapet nga shpendët e egër. Nëse do të kemi dëmtime të shpendëve të oborreve apo të shpendëve të egër, është shumë e rëndësishme që fermerët dhe qytetarët të na informojnë për të ndërmarrë masat e duhura,” shtoi mjeku veteriner.
Kjo sëmundje, që ka shkaktuar gjithashtu vdekjen e disa zogjve të egër në plazhin e Vjetër të Vlorës, mund të shkaktojë dëme të mëdha në sektorin e shpendëve dhe, në raste ekstreme, të ketë ndikime edhe në shëndetin e njeriut.
