Greqia është në bisedime me Izraelin për të zhvilluar një kupolë mbrojtëse kundërajrore dhe raketore prej 2 miliardë eurosh, si pjesë e një përpjekjeje më të gjerë për të modernizuar forcat e saj të armatosura ndërsa rimëkëmbet nga një krizë e zgjatur borxhi, thanë zyrtarët grekë të enjten.
Sistemi i mbrojtjes, raporton Reuters, ka të ngjarë të imitojë Kupolën e Hekurt të Izraelit, si dhe sisteme të tjera që kapin raketa me rreze të shkurtër dhe të gjatë të lëshuar gjatë sulmeve nga fqinjët e tij në mes të konflikteve të vazhdueshme në Gaza dhe Liban.
“Greqia është e prirur të investojë në mbrojtjen e saj për të mbajtur ritmin me aleatin e saj të NATO-s dhe rivalin historik, Turqinë, e cila po zhvillon gjithashtu mbrojtjen e saj ajrore, pavarësisht disa përmirësimeve në marrëdhënie,” shtuan zyrtarët.
Cili është plani
Një burim me njohuri për këtë çështje, pas një konferencë me dyer të mbyllura me ministrin e Mbrojtjes Kombëtare, Nikos Dendias, tha se “plani është krijimi i një sistemi anti-ajror dhe anti-drone me shumë shtresa.”
“Ne jemi në diskutime me Izraelin”, tha burimi.
Një zyrtar i dytë konfirmoi shkallën e marrëveshjes së mundshme, duke shtuar se Greqia do të duhet të shpenzojë 12.8 miliardë euro deri në vitin 2035 për të modernizuar forcat e saj të armatosura.
Mbrojtja ajrore është pjesë e planit 10-vjeçar të prokurimit ushtarak të Athinës, i cili përfshin blerjen e deri në 40 avionëve luftarakë dhe dronëve të rinj F-35 nga SHBA, si dhe katër fregata Belharra dhe avionë Rafale nga Franca.
“Përpjekja jonë ka të bëjë me një tranzicion të shpejtë të forcave tona të armatosura në shekullin 21,” tha ministri i Mbrojtjes Nikos Dendias përpara konferencës të së enjtes.
Reuters raporton se Greqia aktualisht përdor sistemet amerikane Patriot dhe sistemet më të vjetra ruse S-300 për të mbrojtur hapësirën e saj ajrore.
“Pavarësisht disa përmirësimeve në marrëdhëniet e trazuara prej kohësh të Greqisë me Turqinë, fqinjin e saj shumë më të madh lindor, të dy vendet mbeten në mosmarrëveshje për një sërë çështjesh, duke përfshirë kufijtë detarë, burimet energjetike dhe hapësirën ajrore në Mesdheun lindor”, përfundon artikulli.
