Drejtuesi i zyrës së shtypit të Partisë Demokratike, Alfred Lela ka reaguar pas ankesës së Richard Grenell dhe djalit të presidentit amerikan Donald Trump Jr., lidhur me një lajm të publikuar në portalin e tij “Politiko”.
Lajmi, i botuar fillimisht nga Hashtag.al, që ishte ripublikuar edhe në portalin e Lelës, aludonte se Grenell kishte lobuar që kryeministri Edi Rama të takohej në Beograd me Donald Trump Jr., dhe se ky ndërmjetësim kishte dështuar. Por Grenell dhe Trump Jr. e mohuan diçka të tillë si të pavërtetë, duke u ankuar ndaj Lelës.
Megjithatë, në Top Neës, me gazetaren Dafina Hysa, Lela sqaroi se lajmi nuk ishte investigim i tij, por ishte një lajm i Hashtag-ut, dhe si i tillë, kritikat nuk kanë pse shkojnë në drejtim të tij, por për publikuesin origjinal.
Pjesë nga intervista:
“Mirë është që lajmi të jepet i plotë, por lajmi nuk është i Politiko.al, lajmi është i Hashtag.al. Politiko e ka marrë me një citim në fund, duke thënë që lajmi është i një portali tjetër. Kur unë kam marrë reagimin e zotit Grenel…”
Si shpjegohet që zoti Grenell ju adresohet në mënyrë personale?
Arsyeja sipas meje është që zoti Grenell nuk i njeh, dhe nuk i kërkohet të njohë portalet në Shqipëri. Nuk e ka parë në fund të postimit të Politiko, se është e shkruar në fund Hashtag. Dhe duke njohur më shumë Politiko, që është portali i një nënshtetasi amerikan. Ndaj e ka bërë atë të reagojë ndaj meje.
A ndjeni përgjegjësi për një lajm të publikuar në portalin tuaj?
Pse do ndjej unë përgjegjësi. Unë e hoqa, faktet mund të jenë të vërteta, por unë nuk mund t’i verifikoj se lajmi është i një outlet-i tjetër. Faktet mund të jenë të vërteta. Zotëria më drejtohej mua, dhe për sa kohë më bënte thirrje mua, unë e hoqa lajmin.
