Në futboll, si në jetë, gjithçka varet nga momenti i duhur. Një trajner i fortë, një projekt ambicioz dhe një thirrje në kohën e duhur – ndoshta kjo është përzierja që mund ta ketë bindur Kevin De Bruyne të mendojë seriozisht një transferim në Serie A.
Zërat e fundit e lidhin legjendën e Manchester City-t me Napolin e Antonio Conte-s. Një lajm që, nëse konfirmohet, do të ishte i bujshëm: belgu 33-vjeçar është më pranë se kurrë “po”-së ndaj projektit të Conte-s. Por pikërisht këtu qëndron dilema: a është ky projekt vërtet Napoli?
Burime pranë ambientit napolitan raportojnë se kontaktet mes Conte-s dhe De Bruyne kanë nisur prej javësh – telefonata, premtime për një rol qendror në skuadër dhe një respekt i ndërsjellë që mund të shndërrohet në bashkëpunim konkret.
Serie A si sfidë e re për De Bruyne-n
De Bruyne nuk ka fshehur kurrë dëshirën për një eksperiencë të re, në një kampionat më taktik dhe më pak fizik se Premier League – pikërisht si Serie A. Dhe në këtë pikë, emri i Conte-s mund të jetë çelësi vendimtar.
Nuk bëhet fjalë për një mesfushor të zakonshëm. De Bruyne është një prej organizatorëve më të mëdhenj të kësaj epoke – një regjisori që dikton ritmin dhe shpik futboll. Ta sjellësh në Itali do të thotë të rrisësh menjëherë nivelin e kampionatit dhe të japësh një mesazh të qartë: Napoli kërkon madhështi sërish.
Por nëse Conte largohet, çfarë ndodh me De Bruyne?
Problemi i madh qëndron te e ardhmja e vetë Antonio Conte-s. Zërat për një lamtumirë të mundshme në fund të sezonit po shtohen. Disa e shohin shumë pranë rikthimit te Juventus, të tjerë flasin për një kalim sensacional te Milan. Nëse De Bruyne është bindur nga Conte më shumë sesa nga Napoli, atëherë nuk përjashtohet që belgu ta ndjekë trajnerin në destinacionin e tij të ri – duke e lënë Napolin bosh, edhe pa trajnerin edhe pa yllin e premtuar.
Një goditje e dyfishtë për një klub që shpresonte të rilindte pikërisht përmes këtyre dy emrave.
Iluzion apo realitet?
Për momentin gjithçka mbetet në nivel zërash, por siç ndodh shpesh, aty ku tymi është i dendur, nuk mungon as zjarri. Tifozët presin, shpresojnë, por janë të shqetësuar nga ajo ndjesi e bezdisshme që shoqëron çdo ëndërr që duket shumë e bukur për të qenë e vërtetë.
A do të jetë vërtet Kevin De Bruyne goditja e madhe e Napolit për Champions-in, apo thjesht një tjetër iluzion i një vere të gjatë dhe të komplikuar?
