Më 3 dhjetor 2025, Grupi për Studime Politike dhe Juridike (GLPS) organizoi një Konferencë Kombëtare me temë “Qytetarët të parët – Drejt shërbimeve publike me në qendër qytetarët në Kosovë”. Konferenca u fokusua në modernizimin e administratës publike dhe digjitalizimin e shërbimeve, me qëllim zvogëlimin e barrës administrative për qytetarët. Njomza Arifi, drejtoresha ekzekutive e GLPS, theksoi se reforma e administratës është e domosdoshme jo vetëm për përmbushjen e kërkesave të Bashkimit Evropian, por edhe për përmirësimin e jetës së qytetarëve.
Kushtrim Canolli, koordinator për zvogëlimin e barrës administrative nga Zyra e Kryeministrit, diskutoi progresin e arritur nëpërmjet digjitalizimit, duke theksuar bashkëpunimin me partnerë zhvillimorë, shoqërinë civile dhe biznesin. Ai e cilësoi ndihmën e teknologjisë si një faktor kyç në këtë përmirësim. Jose Diaz, këshilltar i lartë nga SIGMA/OECD, sugjeroi krijimin e një portali të vetëm kombëtar për shërbimet publike, që do të lejonte qytetarët të kishin akses në shërbime të ndryshme, përfshirë tatimet dhe sigurimet shoqërore. Po ashtu, ai përmendi përdorimin e inteligjencës artificiale për identifikimin e barrave administrative.
Hulumtuesi Naser Shamolli nënvizoi se legjislacioni i ndërlikuar dhe numri i akteve nënligjore përbëjnë sfida të rëndësishme, duke theksuar nevojën për qartësi dhe diskutim më të gjerë rreth efektivitetit të reformave. Një raport i prezantuar nga Elona Kurti, koordinatore e projekteve në GLPS, nxori në pah perceptimet e qytetarëve për shërbimet e administratës publike në tri komuna: Podujevë, Prishtinë dhe Mitrovicë. Në përgjithësi, qytetarët e vlerësuan pozitivisht shpejtësinë e shërbimeve dhe sjelljen e stafit, megjithatë lokacionet e institucioneve u konsideruan sfiduese.
Në Podujevë, 70% e qytetarëve shprehën kënaqësi të lartë për shërbimet digjitale dhe fizike. Edhe pse Prishtina dhe Mitrovica treguan përparime, vlerësimet ndryshonin sipas aspektëve të matura. Qytetarët evidentuan përmirësime në shpejtësinë dhe thjeshtësinë e shërbimeve gjatë viteve, tregues i progresit në administratën publike.
