Grupi për Studime Politike dhe Juridike (GLPS) ka bërë thirrje për një konsensus politik të gjërë për adresimin e çështjeve integruese të Kosovës, duke evidentuar se ngërçi politik i krijuar pas zgjedhjeve të shkurtit 2025 ka sjellë pasoja të rënda për zhvillimin ekonomik dhe reputacionin ndërkombëtar të vendit. Drejtoresha ekzekutive e GLPS, Njomza Arifi, theksoi se mungesa e funksionimit normal të institucioneve ka penguar qasjen në qindra milionë euro nga fondet ndërkombëtare dhe programet e rritjes, me rrezik të madh për humbjen e mbi 800 milionë eurove, që përbën një potecial të madh për zhvillim.
Arifi paralajmëroi se vonesat në krijimin e institucioneve kanë ndikuar negativisht në realizimin e fondeve nga Banka Botërore dhe iniciativa të tjera zhvillimore. Ajo theksoi se Kosovës i është humbur një vit i tërë reformash, duke u bllokuar në procese të rëndësishme si sundimi i ligjit dhe zhvillimi demokratik. Sipas raportit të progresit, reformat themelore kanë stagnuar për shkak të krizës institucionale, pavarësisht disa përmirësimeve.
Me zgjedhjet e parakohshme që pritet të mbahen më 28 dhjetor, Arifi u bëri thirrje partive politike që të tejkalojnë interesat e tyre dhe të gjejnë konsensus në tri prioritete thelbësore: anëtarësimi i Kosovës në Këshillin e Evropës, aplikimi për statusin e kandidatit për Bashkimin Evropian dhe përmbushja e zotimeve nga marrëveshja e Ohrit në dialogun me Serbinë.
Ajo theksoi se stabiliteti politik është i domosdoshëm për çdo plan të rritjes ekonomike dhe proces integrues, duke nxjerrë në pah nevojën që Kosova të fokusohet në integrimin evropian dhe të përmbushë obligimet e saj nga dialogu. Arifi përfundoi duke shprehur se janë procese që e tejkalojnë agjendën partizane, duke kërkuar që politika të fokusohet në të mirat e përbashkëta të vendit.
