Gjykata Themelore në Prishtinë ka njoftuar kryeministrin Albin Kurti se duhet të paraqitet për të dhënë dëshmi në Prokurorinë Speciale më 4 mars.
Zëdhënësja e Gjykatës Themelore, Mirlinda Gashi, ka konfirmuar se gjyqtari i procedurës paraprake ka lëshuar urdhrin për dëshminë, duke u bazuar në kërkesën e Prokurorisë Speciale.
“Ju njoftojmë se Gjykata Themelore në Prishtinë – Departamenti Special, me kërkesë të Prokurorisë Speciale të Republikës së Kosovës, ka lëshuar Urdhrin më datë 21.02.2025, duke e obliguar dëshmitarin A.K. të paraqitet si dëshmitar dhe të japë dëshminë e tij më datë 04.03.2025, në orën 10:00, në Prokurorinë Speciale të Republikës së Kosovës. Gjykata Themelore në Prishtinë – Departamenti Special ka pranuar përgjigjen e Zyrës së Kryeministrit lidhur me këtë urdhër më datë 28.02.2025, përmes emailit”, ka thënë Gashi.
Kryeministri i Kosovës është thirrur për të dëshmuar lidhur me rastin e rezervave shtetërore.
