Rojet kufitare polake zbuluan mbi 100 kg kokainë në fundin e Detit Baltik, në Gjirin e Gdanskut, në veri të Polonisë, gjatë operacioneve për mbrojtjen e infrastrukturës kritike. Droga që vlerësohet deri në 15 milionë dollarë, u gjet gjatë një hetimi që çoi në arrestimin e shtatë personave.
Pas zbardhjes së rastit, autoritetet lokalizuan të dyshuarit, çka çoi në gjetjen e një sasie tjetër të konsiderueshme droge. Sipas ligjit, të arrestuarit mund të përballen me deri në 20 vjet burg nëse shpallen fajtorë.
Ky incident ndodhi në një periudhë kur shtetet e Detit Baltik janë në gatishmëri të lartë për mbrojtjen e infrastrukturës kritike nën ujë, pas disa incidenteve të dyshimta që kanë shkaktuar dëme në kabllot dhe tubacionet e gazit. NATO njoftoi se do të forcojë praninë e saj në rajon për të monitoruar aktivitetet dhe për të parandaluar dëmtime të tjera.
