Kompania franceze e teknologjisë, Capgemini, shpalli të dielën se do të shesë filialin e saj që punon me policinë e imigracionit në SHBA (ICE), një temë që ka shkaktuar shumë polemika ndërkombëtare për metodat e dhunshme të përdorura nga këta agjentë federalë. Kjo kompani ka qenë nën vëmendjen e mediave për disa ditë pas publikimit të një kontrate nga NGO Observatoire des Multinationales, e cila tregon se filiali amerikan, Capgemini Government Solutions, kishte nënshkruar një marrëveshje me ICE për identifikimin e shtetasve të huaj në territorin amerikan dhe ndjekjen e lëvizjeve të tyre.
Në një njoftim për shtyp, Capgemini shpjegoi se “kufizimet ligjore zakonore që imponohen në SHBA për kontraktimin me entitete federale që kryejnë aktivitete të klasifikuara, nuk i lejuan Grupit të ushtrojë kontroll të duhur mbi aspekte të caktuara të operacioneve të këtij filiali”. Sipas kompanisë, ky filial përbën 0.4% të shitjeve globale të Grupit për vitin 2025 dhe më pak se 2% të shitjeve të tij në SHBA. Processi i shitjes së këtij entiteti do të niset menjëherë, bëri të ditur Capgemini.
Protestat kundër ICE janë shtrirë tashmë në Evropë, ku Capgemini, që operon në rreth 50 vende dhe është një nga kompanitë më të mëdha të listuara në Francë, është bërë subjekt i shumë protestave. Anëtarë të parlamentit dhe ministri i Financave francez, Roland Lescure, e kanë kërkuar kompaninë të shpjegojë aktivitetet e saj në SHBA. Sindikata CGT Capgemini nisi një peticion online që kërkonte përfundimin e bashkëpunimit me qeverinë amerikane, duke akuzuar kompaninë për “ndjekjen, arrestimin, kidnapimin dhe deportimin e dhjetëra mijëra njerëzve”.
Operacionet e ICE në Minneapolis, kohët e fundit çuan në vdekjen e dy qytetarëve amerikanë, Alex Pretti dhe Renee Good. Demonstratat anti-ICE u mbajtën në Francë dhe Itali, ku praninë e paralajmëruar të agjentëve federalë amerikanë në Lojërat Olimpike Dimërore, në një rol “këshillimor” pa patrullime të planifikuara, e kanë kritikuar ashpër.
