Gjatë vitit të kaluar, në territorin e vendit janë regjistruar 1 666 aksidente rrugore, një rritje prej 23% krahasuar me vitin 2023. Ky trend lidhet kryesisht me shtimin e qarkullimit rrugor, për shkak të rritjes së numrit të automjeteve në përdorim dhe fluksit të lartë turistik gjatë muajve të verës.
Sipas të dhënave të publikuara nga Ministria e Brendshme, shkaqet kryesore të këtyre aksidenteve mbeten të pandryshuara krahasuar me vitet e mëparshme: mosrespektimi i rregullave të qarkullimit, drejtimi i mjetit nën efektin e alkoolit, tejkalimi i shpejtësisë së lejuar, përdorimi i celularit gjatë drejtimit, si dhe pakujdesia në rrugë.
Paralelisht me rritjen e aksidenteve, Policia e Shtetit ka rritur edhe numrin e masave administrative. Gjatë vitit 2024 janë vendosur rreth 1.18 milionë masa ndëshkuese, që përfshijnë gjoba, pezullime të patentave dhe sanksione të tjera sipas legjislacionit në fuqi. Sipas raportit vjetor të ministrisë, kjo tregon një përmirësim në zbatimin e ligjit dhe rritje të kontrollit ndaj shkelësve të rregullave të qarkullimit.
Për të parandaluar shkeljet dhe për të rritur sigurinë rrugore, Policia Rrugore ka ndërmarrë edhe masa shtesë, si kontrolle të përforcuara në akset kryesore, instalimi i radarëve dhe kamerave të sigurisë, si dhe shtimi i patrullave në zonat me risk të lartë për aksidente.
