Në një vend ku vera zakonisht lidhet me turizmin, relaksin dhe atmosferën e gjallë të bregdetit, pak kush do të kishte menduar se vëmendja këtë herë do të përqendrohej… te gjarpërinjtë. Por pikërisht kjo është situata që po përjetohet në Shëngjin dhe Velipojë ditët e fundit. Banorë dhe pushues të alarmuar po ndajnë video, foto dhe rrëfime të hollësishme që dokumentojnë një praninë të pazakontë të gjarpërinjve në rrugë, trotuare dhe afër zonave të mbipopulluara gjatë sezonit turistik.
Një qytetare, teksa udhëtonte me makinë, tregoi se kishte parë të paktën shtatë apo tetë gjarpërinj duke kaluar asfaltin pa asnjë shqetësim. Në një tjetër rast më serioz, një grua raportoi se ishte pickuar dhe kishte kaluar 12 ditë në reanimacion në gjendje të rëndë. Kjo dukuri po shkakton frikë të përhapur dhe ndjesi pasigurie mes publikut.
Përveç rrezikut real që paraqesin këto raste, ajo që bie më së shumti në sy është mosbesimi i thellë ndaj institucioneve dhe mungesa e një reagimi apo shpjegimi zyrtar. Në komentet online, shumë qytetarë aludojnë për skenarë të qëllimshëm. Disa fajësojnë turistët që udhëtojnë me motorë, duke pretenduar se “kanë sjellë gjarpërinjtë në çanta”, ndërsa të tjerë përmendin teori konspirative që përfshijnë shërbime sekrete të huaja me qëllim sabotimin e turizmit shqiptar.
