Federata Shqiptare e Futbollit (FSHF) ka reaguar me tronditje pas ngjarjes së rëndë që ndodhi mbrëmjen e së martës në ambientet e Shtëpisë së Futbollit, ku humbi jetën futbollisti Bledar Hajdari, pjesë e ekipit FC Dajti në kampionatin amator FSHF Sunday League Albania.
Në një deklaratë zyrtare, FSHF shpreh dhimbjen e thellë dhe solidaritetin me familjen Hajdari dhe ekipin FC Dajti:
“Federata Shqiptare e Futbollit shpreh tronditjen e thellë për këtë ngjarje tragjike… I përcjellim ngushëllimet më të sinqerta familjes Hajdari dhe skuadrës së FC Dajtit për këtë humbje të rëndë që ka prekur gjithë komunitetin e futbollit shqiptar.”
Tragjedia ndodhi gjatë ndeshjes gjysmëfinale mes FC Dajtit dhe FC Lumnineses, kur 28-vjeçari Hajdari pësoi një atak kardiak në fushë. Ai u ndihmua menjëherë nga stafi mjekësor dhe u transportua me urgjencë në Spitalin e Traumës, por, pavarësisht përpjekjeve për ta shpëtuar, nuk mundi t’i mbijetojë ndalimit kardiak.
Humbja e tij ka tronditur thellë jo vetëm ekipin dhe të afërmit, por edhe gjithë komunitetin e futbollit amator në vend. Bledar Hajdari kujtohet si një sportist i përkushtuar, i dashur dhe me shpirt skuadre, i vlerësuar nga bashkëlojtarët dhe miqtë.
Në këto momente dhimbjeje, FSHF shpreh mbështetjen e saj të plotë për familjen Hajdari, duke ndarë dhimbjen për këtë humbje të parakohshme që ka lënë një boshllëk të ndjeshëm si në fushën e blertë, ashtu edhe në zemrat e shumë sportdashësve.
