Zjarret që për tre ditë rresht përfshinë fshatrat e Gramshit lanë pas shkatërrim masiv. Banorët përballen tashmë me shtëpi të shkatërruara, qindra bagëti të djegura, mijëra hektarë pyje dhe pemtari të shkrumbuar si dhe dëme që i zhdukën përpjekjet e një jete të tërë.
Teksa flakët afroheshin, banorët përjetuan momente tmerri ndërkohë që pastrimi i këtij kaosi do të kërkojë shumë kohë dhe energji.
Autoritetet lokale dhe ekipet emergjente po punojnë intensivisht për groposjen e kafshëve të ngordhura, rikthimin e energjisë elektrike dhe furnizimit me ujë, si dhe shpërndarjen e ndihmave për të mbijetuarit. Banorët, nga ana e tyre, shprehen mosbesim ndaj ndërhyrjes së shtetit, por nuk kanë alternativë tjetër përveç bashkëpunimit me ekipet e emergjencës.
Ekspertët paralajmërojnë se rikthimi i zonës në normalitet do të jetë i gjatë, veçanërisht për pyjet me pisha, të cilat do të kërkojnë dekada për t’u rikuperuar.
