Banorët e fshatit Shtushaj, që bën pjesë në njësinë administrative Shupenzë në Bashkinë e Bulqizës, po përballen me një situatë të pazakontë dhe shqetësuese.
Prej disa vitesh, ata raportojnë raste të çuditshme ku qentë shtëpiakë u ngordhin në rrethana misterioze. Sipas tyre, fenomeni është përkeqësuar ndjeshëm gjatë ditëve të fundit. Shumë prej banorëve tregojnë se sa herë lëshojnë qentë jashtë shtëpisë, i gjejnë më pas të ngordhur nëpër ara apo rrugë.
Ky problem, i cili daton që prej afro 8 vitesh, ka bërë që numri i qenëve në fshat të bjerë ndjeshëm, dhe aktualisht vetëm tre prej tyre kanë mbetur. Rastet e fundit janë edhe më tronditëse: banorët pohojnë se kanë parë qentë duke u dridhur në momentet e fundit të jetës, çka ngre dyshime për helmim të qëllimshëm.
Përballë kësaj situate, banorët kërkojnë ndërhyrjen e policisë për të hetuar ngjarjet dhe për të ndëshkuar autorët e mundshëm. Ata shprehin gjithashtu shqetësimin se fëmijët mund të bien në kontakt me lëndët helmuese që mund të jenë shpërndarë në mënyrë të pakontrolluar në ambientet e fshatit.
Edhe pse nuk kanë asnjë person të dyshuar konkret, disa banorë dyshojnë se qëllimi mund të jetë krijimi i mundësive për grabitje të banesave, duke larguar kafshët që shërbejnë si mbrojtje.
