Franca ka hapur një konsullatë në kryeqytetin e Groenlandës, Nuuk, duke forcuar praninë e saj diplomatike në Arktik dhe duke përmbushur premtimin e bërë nga presidenti Emmanuel Macron gjatë vizitës së tij në ishull vitin e kaluar. Kështu, Francia bëhet vendi i parë i BE-së që themelon një konsullatë të përgjithshme në Groenlandë, para partnerëve të saj të Bashkimit Evropian.
Megjithatë, Brukseli është tashmë i pranishëm në ishull, pas hapjes së një zyre të Komisionit Evropian në vitin 2024. Jean-Noël Poirier, ish-ambasadori francez në Vietnam, ka marrë detyrën e tij në Nuuk, ku do të përfaqësojë Francën në këtë territor të Danimarkës, që ka rreth 56,000 banorë. Deri tani, shtetasit francezë që jetonin në Groenlandë kanë pasur një marrëdhënie të kufizuar konsullore, e cila ishte menaxhuar nga konsulli nderi, Kristine Winberg, e cila kryente procedurat administrative dhe assitencën konsullore.
Sipas burimeve, vetëm tetë shtetas francezë janë të regjistruar në Nuuk, megjithatë, mendohet se rreth tridhjetë jetojnë në Groenlandë. Pavarësisht numrit të vogël të popullsisë franceze në ishull, konsullata e re do të ketë përgjegjësi të zgjeruara. Përveç ofrimit të mbështetjes administrative për qytetarët francezë, ajo do të punojë për të thelluar projektet e bashkëpunimit me Groenlandën në fushat kulturore, shkencore dhe ekonomike, si dhe për të forcuar lidhjet politike me autoritetet lokale.
Parisi pret që ky hap të forcojë lidhjet midis Groenlandës, Francës dhe BE-së, në një rajon që ka shërbyer si burim tensionesh të rëndësishme midis Evropës dhe SHBA-së, sidomos pas kërkesave të përsëritura nga presidenti amerikan Donald Trump për të marrë kontrollin mbi territorin. SHBA e shikon ishullin si të rëndësishëm për sistemin e saj të mbrojtjes me raketat dhe përballimin e kërcënimeve nga Rusia dhe Kina. Si Franca ashtu edhe Kanadaja, të dyja që kundërshtojnë çdo marrje në dorë të Groenlandës nga SHBA, kanë hapur konsullata në Nuuk.
Tensionet e fundit kanë çuar gjithashtu në krijimin e një kuadri diskutimesh midis presidentit amerikan dhe sekretarit të përgjithshëm të NATO-s për të ardhmen e ishullit, duke krijuar një grup pune që bashkon përfaqësuesit amerikanë, danezë dhe groenlandezë.
