Kryeministri Edi Rama ka reaguar ndaj akuzave të Sali Berishës, që e kritikuan për udhëtimin me helikopter në Korçë pas problemeve në infrastrukturë. Në një postim në X, Rama ka postuar dy foto nga helikopteri dhe ka sqaruar se udhëtimi i tij përfshinte jo vetëm Korçën, por edhe Vlorën, me qëllimin për të shoqëruar një grup investitorësh të njohur ndërkombëtarisht në fushën e arsimit të lartë.
Rama shpjegoi se investitorët vinin nga Rinasi në Korçë dhe më pas planifikonin të udhëtonin në Vlorë me helikopterin e tyre. Ai theksoi se helikopteri i Forcave të Armatosura, që ai përdorte, bëntë fluturime të rregullta për të përmbushur orët e nevojshme të fluturimit, dhe në këtë rast i shërbente një qëllimi më të mirë.
Kryeministri e quajti “ligësi” të akuzosh qeverinë për problemet e aksit Përrenjas-Librazhd, duke theksuar se rrëshqitja gjeologjike ishte një fenomen natyror dhe se nuk kishte lidhje me përgjegjësitë profesionale të autoriteteve. Ai përmendi edhe një ngjarje të ngjashme që po ndodhte aktualisht në Itali, ku një masiv rrezikonte të shkatërronte një qytezë, duke rikujtuar se atje nuk kishte asnjë kanal mediatik që të trajtonte situatën me të njëjtën histeri që po ndodhte në Shqipëri.
Rama e përfundoi me një mesazh të fortë, duke thënë se ai kishte prekur çdo cep të Shqipërisë dhe se kishte marrë mbështetje të konsiderueshme nga populli, pavarësisht kritikave nga media dhe politikanët. Ai shtoi se fluturimi kishte qenë i planifikuar më parë për t’i mundësuar investitorëve të shihnin potencialin e Korçës dhe Vlorës brenda një kohe të shkurtër. Në përfundim, ai nënvizoi se pavarësisht kritikave, puna dhe veprat do të ishin ato që do të mbeteshin në histori.
