Një grup kriminal, përfshirë dy shqiptarë nga Liverpuli, është dënuar për organizimin e një plani të avancuar për trafikun e kokainës nga Amerika dhe Meksika, me destinacion aeroportin e Mançesterit në Mbretërinë e Bashkuar. Hetimi i Agjencisë Kombëtare të Krimit (NCA) zbuloi se shqiptarët Elton Hallaci (32 vjeç) dhe Artur Iseberi (27 vjeç) ishin pjesë e një grupi të strukturuar që merreshin me transferimin e drogës nga kurierët amerikanë.
Ky grup krijoi një rrjet ndërkombëtar për kontrabandimin e kokainës përmes fluturimeve nga Cancun në Meksikë në aeroportin e Mançesterit. Në vitin 2024, kurierët udhëtuan pa bagazh dhe ndihmoheshin nga një organizator në terren i quajtur “Nate”, të cilët merrnin valixhe që përmbanin qindra kilogramë kokainë. Pas mbërritjes në aeroport, ata transferuan drogën te Iseberi dhe Hallaci, të cilët merreshin me shpërndarjen e saj brenda Britanisë.
Më 11 maj 2024, tetë valixhe me kokainë arritën nga Cancun dhe Barbados. Hallaci dhe Iseberi morën pesë prej tyre, ndërsa një valixhe mbeti e braktisur, në të cilën u gjetën 20 blloqe me nga një kilogram secili. Hetimi zbuloi se shqiptarët kishin mbledhur rreth 100 kg kokainë në këtë rast. Një muaj më vonë, më 31 maj, 300 kg kokainë me pastërti të lartë u sekuestruan në Mançester.
Gjatë hetimeve, u gjetën çelësa për një makinë Jaguar me ndarje sekrete për kontrabandën dhe shënime për shpërndarjen e drogës në qytete si Bradford, Londër dhe Birmingham. NCA sekuestroi gjithashtu dy makina të tjera Jaguar të ngjashme. Operacioni u monitorua nga kamerat e sigurisë dhe hetuesit, që kishin vënë nën mbikëqyrje dyshuarit.
Pas pranim përgjegjësie, Hallaci, Iseberi dhe një tjetër, Hosker, u akuzuan për kontrabandë dhe mbajtje me qëllim shpërndarje. Dënimet e tyre priten të shpallen në një datë të mëvonshme. Cat McHugh nga NCA vuri në dukje dëmin e madh që këto grupe i sjellin shoqërisë dhe rëndësinë e hetimeve të tilla për të ndaluar trafikun e drogës. Hetimet vazhdojnë për të zbuluar më shumë pjesëmarrës në këtë rrjet kriminal.
