Kreu i SPAK, Altin Dumani ditën e sotme ka qenë i pranishëm në forumin rajonal të mirëqeverisjes dhe luftës kundër korrupsionit. Gjatë fjalës së tij ai bëri me dije se institucioni që drejton ka goditur krimin e organizuar, duke siguruar rezultate reale, teksa iu referua atyre që sipas tij konsideroheshin si të paprekshëm.
“Sa i takon krimit të organizuar kemi pasur rezultate të prekshme duke proceduar penalisht persona që më herët re konsideroheshin të paprekshëm. Kemi arritur të sekuestrojmë dhe konfiskojmë vlera të konsiderueshme deri në 150 milionë euro.”, deklaroi ai.
Nga ana tjetër, Dumani theksoi se SPAK ka nevojë për instrumente shtesë, në mënyrë që puna të jetë më efikase.
“Vlerësoj se është e nevojshme të kemi disa mjete, instrumente në dorën tonë. Shumica e vendeve të Ballkanit e kanë kuptuar këtë dhe janë në të njëjtin trend duke krijuar struktura të posaçme, si ne RMV, Mal të Zi dhe Kosovë. Është i nevojshëm një legjislacion i mirë.”, shtoi ai.
Ndërkohë, në forum mbajti fjalën edhe ambasadori i BE, Silvio Gonzato, i cili theksoi se lufta kundër korrupsionit është thelbësore për integrim në aleancën euroatlantike.
