Sezoni i ri i Formula 1 në vitin 2026 pritet të jetë revolucionar, por ka sjellë edhe polemika të forta në aspektin teknik. Me rregulloren e re, skuderitë po eksplorojnë “zonat gri” për të përfituar përparësi. Sipas ‘Motorsport Magazin’, një përplasje është shfaqur mes Mercedes dhe Red Bull mbi raportin e kompresionit të cilindrave të motorëve të rinj. Këto skuadra kanë arritur të implementojnë një sistem që ju lejon të driblojnë rregulloren teknike duke rritur raportin e kompresionit vetëm kur makina është në pistë, ndërkohë që raporti i përgjithshëm mbetet brenda parametrave të lejuara.
Kjo manovër ka si synim për të maksimizuar performancën e motorëve, duke pasur parasysh ndryshimet në rregulla që kanë reduktuar raportin maksimal nga 18:1 në 16:1. Të tjerë prodhues si Ferrari, Audi dhe Honda, dyshojnë për një manipulim të tillë dhe kanë kërkuar ndërhyrjen e Federatës Ndërkombëtare të Automobilizmit (FIA).
Sikur të mos mjaftonte kjo, një ish-punonjës i Mercedes ose Red Bull ka zbuluar detajet e kësaj manovre te një skuderie tjetër. Skuadrat duket se kanë krijuar komponentë që zgjerohen gjatë operimit me temperatura të larta, duke rritur efektivisht raportin e kompresionit. Kjo sjell në vëmendje nevojën për rregullore më të qarta dhe të detajuara nga FIA.
Kërkesa për qartësi dhe një konkurrencë të ndershme është kritike, dhe FIA ka theksuar se është duke e monitoruar situatën. Ndërkohë, ata kanë konfirmuar se zgjerimi termik mund të ndikojë në temperaturat e funksionimit, por aktualisht rregullat nuk parashikojnë matje në kushte të tilla. Kjo çështje do të diskutohet më tej në takimet e ardhshme teknike me prodhuesit e njësive të fuqisë, dhe mund të sjellë përmirësime në rregullore si pasojë e shqetësimeve të shfaqura nga skuderitë. Sezoni i ri premton të jetë i mbushur me sfida dhe intrigë për ekipet dhe tifozët e Formula 1.
