Pika kufitare e Morinës ka pësuar një rritje të ndjeshme të qarkullimit gjatë 24 orëve të fundit, duke u kthyer në një nga nyjet më të ngarkuara të lëvizjes mes Shqipërisë dhe Kosovës.
Sipas statistikave të Policisë Kufitare dhe Migracionit, vetëm gjatë kësaj periudhe në territorin shqiptar kanë hyrë 10.684 shtetas, të shoqëruar nga 4.472 automjete. Megjithatë, dinamika më e madhe është vërejtur në drejtim të kundërt, ku nga Shqipëria kanë dalë 12.601 persona me 4.976 mjete, duke reflektuar një fluks të shtuar drejt Kosovës.
Për të përballuar situatën dhe për të shmangur radhët e gjata, autoritetet kanë vënë në funksion 12 sportele në të dy drejtimet, duke garantuar përpunim më të shpejtë të lëvizjeve.
Burime zyrtare bëjnë me dije se shumica e udhëtarëve në dalje janë emigrantë kosovarë që jetojnë në vende si Italia, Zvicra dhe Gjermania, të cilët po shfrytëzojnë Shqipërinë si itinerar tranziti.
