Në të gjithë Shqipërinë, fleta e votimit do të ketë të njëjtat përmasa, pavarësisht qarkut. Me dimensione 58.3 x 29.7 cm, ajo është mjaft e madhe, si në Tiranë, ku garojnë 37 kandidatë për mandatet e Kuvendit, ashtu edhe në Kukës, ku ka vetëm 3 kandidatë për çdo subjekt.
“Një gjë duhet të kemi parasysh, për ta rikonfirmuar: fleta e votimit do të jetë njësoj për të gjitha qarqet,” tha kreu i KQZ-së, Ilirjan Celibashi.
Ndryshimi i vetëm do të jetë hapësira mes emrave të kandidatëve, në varësi të numrit të tyre në secilin qark. Megjithatë, madhësia e gërmave dhe lloji i shkrimit do të mbeten të njëjta. “Në Tiranë ka më shumë kandidatë dhe dendësi më të madhe emrash, por të gjithë janë të lexueshëm,” shtoi Celibashi.
Disa parti politike kërkuan që krahas emrave të kandidatëve të përfshiheshin edhe numrat e tyre në fletë, por Celibashi sqaroi se renditja bëhet sipas alfabetit, siç përcakton Kodi Zgjedhor.
Më 11 maj, shqiptarët do të votojnë mes 11 subjekteve politike dhe një total prej 2046 kandidatëve për deputetë.
