E ftuar në emisionin “Rudina” në TV Klan, Elia Zaharia ka folur për herë të parë publikisht pas ndarjes nga Princ Leka. Ajo ndau disa nga mendimet dhe përjetimet e saj gjatë kësaj periudhe të vështirë.
E pyetur nga Rudina se çfarë e ka mësuar më shumë kjo periudhë, Elia u përgjigj pa hezitim:
“Do ta them me një fjalë: dimensionin e faljes. Kjo për mua nuk ka të paguar.”
Rudina e pyeti më tej se si ndihet aktualisht dhe Elia tregoi se, pavarësisht kompleksitetit të situatës, ndjehet e mbështetur dhe e bekuar nga familja:
“Ka qenë një periudhë komplekse, mirëpo unë falënderoj Zotin çdo ditë për atë mbështetje që më ka dhënë familja ime, rrethi im. Unë jam me shumë fat se prindërit e mi, familja ime, nuk janë vetëm familje, por janë dhe miqtë e mi më të mirë, me të cilët unë mund të ndaj çdo gjë: gjërat e vështira, gjërat e gëzuara. Dhe, o Zot, unë them: vetëm t’i duam dhe t’i falënderojmë prindërit çdo ditë për aq kohë sa janë.”
Një tjetër moment i rëndësishëm i intervistës ishte kur Elia foli për prioritetin e saj më të madh – vajzën e saj, Geraldinën.
“Ajo që për mua është prioritet është mirëqenia e vajzës sime. Unë dua që ajo të ndihet ngrohtë shpirtërisht dhe të marrë dashuri nga të dy krahët. Për mua kjo është e vetmja gjë që vlen.”
Kur Rudina komentoi për bukurinë e vajzës, si një princeshë e vogël, Elia shtoi:
“Rritet me vlera, kjo ka rëndësi. Sepse fisnikëria e vërtetë është në zemër. Fisnikërinë nuk ta japin as titujt, as ofiqet. Unë uroj që ajo të ketë një zemër të pastër, të jetë një vajzë e mirë, të përgatitet, të bëhet e zonja e vetes dhe t’i dojë njerëzit, të jetë fisnike në zemër.”
Në fund të bisedës, si për ta mbyllur me një mesazh shprese, Rudina theksoi se “koha do të vërë çdo gjë në vendin e vet” – një ide me të cilën Elia u tregua plotësisht dakord.
Pas më shumë se një dekade bashkëjetese dhe një martese madhështore në vitin 2016, Elia Zaharia dhe Princ Leka vendosën t’i jepnin fund martesës së tyre. Lajmi u bë publik në fillim të vitit 2024, përmes një deklarate zyrtare nga Princ Leka, ku theksohej se ndarja ishte bërë me mirëkuptim dhe respekt të ndërsjellë, me prioritet të përbashkët mirëqenien e vajzës së tyre, Geraldinës. Pavarësisht zhurmës mediatike, të dy kanë zgjedhur të ruajnë dinjitetin dhe privatësinë, duke treguar një nivel të lartë maturie dhe fisnikërie në sjellje publike.
