Kryebashkiaku demokrat i Kavajës, Fisnik Qosja ka surprizuar edhe këtë herë duke marrë pjesën në takimin e thirrur nga kryeministri Edi Rama me kryetarët e bashkive të Shqipërisë, me në fokus zhvillimin e turizmit dhe kryesisht atë në zonën bregdetare.
Pavarësisht forcës politike që përfaqëson, Fisnik Qosja është ngritur në lartësinë e detyrës duke vendosur një marrëdhënie të re bashkëpunimi me qeverinë qendrore, për të marrë fonde për qytetarët e tij.
Edi Rama e kërkoi mes turmës dhe kryebashkiaku i Kavajës ishte aty, duke marrë pas një falenderim publik për angazhimin dhe pak humor, si i vetmi demokrat mes socialistëve.
“Shpresoj që në këtë përpjekje të në bashkohet edhe Kavaja demokratike, që uroj t’i ndalojë zhvillimin e mëtejshëm të pallateve në vend të pishave. Ka ardh ai kryetari i Bashkisë së Kavajës këtu?! (Fisnik Qosja ngre dy gishtat lart.) Rrofsh, faleminderit shumë! Hudhrën e paskemi me vete”, u shpreh Edi Rama.
Gjithashtu, kreu i qeverisë shqiptare bëri me dije se të gjithë ata operatorë turistikë që kanë aplikuar për leje dhe kanë vendosur çadra në bregdet, por që janë konstatuar se nuk kanë respektuar kriteret, nuk do të kenë më mundësi të palikojnë.
Edi Rama zbuloi sot se nga viti i ardhshëm, Ksamili dhe Dhërmiu do të jenë plazhe publike në menaxhim të plotë nga bashkitë respektive, Saranda dhe Himara.
“Uroj shumë që të ketë dëgjuar kush duhet të dëgjojë, por do t’i përsërisim disa herë këto, në mënyrë që ata që janë mësuar të dhunojnë plazhet me shezlongë të ngjitur me njëri-tjetrin dhe me bishta çadrash, të mos marrin më mundimin të aplikojnë më, fare.
Shumë shpejt do nxjerrim planin e ri për bregdetin dhe në bashkëpunim me të gjithë bashkitë, do të kuptojmë ekzaktësisht se cilat plazhe bashkitë do t’i marrin tërësisht. Por dy janë të sigurta, Ksamilin dhe Dhërmiun”, përmbylli kryeministri.
