Këtë të diel në Kosovë do të fillojë ushtrimi i madh ushtarak “Defender Europe 2025”, i udhëhequr nga Ushtria e Shteteve të Bashkuara për Evropë dhe Afrikë. Qëllimi i këtij ushtrimi është të dëshmojë aftësinë e NATO-s për të mbrojtur kufijtë lindorë dhe për të forcuar gatishmërinë ushtarake dhe bashkëpunimin ndërmjet vendeve aleate dhe partnere.
Ministri i Mbrojtjes në detyrë, Ejup Maqedonci, bëri të ditur se Forca e Sigurisë së Kosovës do të marrë pjesë në këtë ushtrim ndërkombëtar, i cili është një nga më të mëdhenjtë që organizohet nga SHBA në Evropë dhe Afrikë.
Në këtë operacion janë të angazhuar rreth 25 mijë trupa nga 29 vende pjesëmarrëse. Ushtrimet do të zhvillohen në 18 shtete, përfshirë Kosovën, Shqipërinë, Bullgarinë, Kroacinë, Çekinë, Finlandën, Greqinë, Hungarinë, Letoninë, Lituaninë, Malin e Zi, Maqedoninë e Veriut, Norvegjinë, Poloninë, Rumaninë, Sllovakinë, Slloveninë dhe Suedinë.
Gjatë dy javëve të ardhshme, Kosova do të mirëpresë zhvillimin e këtij ushtrimi, ndërsa Ministria e Mbrojtjes ka paralajmëruar se nga dita e hënë deri më 9 qershor do të ketë lëvizje të konvojeve ushtarake nga bazat e FSK-së në drejtim të Aeroportit të Gjakovës dhe poligonit ushtarak në Babaj të Bokës.
Përmes pjesëmarrjes në “Defender Europe 2025”, Kosova kontribuon në rritjen e bashkëpunimit rajonal dhe në forcimin e kapaciteteve të saj mbrojtëse, duke shënuar një hap të rëndësishëm drejt integrimit në strukturat europiane dhe ndërkombëtare të sigurisë.
