Viti i ri shkollor e ka gjetur Lagjen Nr.1 të Durrësit me nxënës të shpërndarë në gjimnaze të tjera, pasi shkolla e tyre e mesme “Gjergj Kastrioti” ende nuk ka një projekt rindërtimi. Pesë vite pas tërmetit të nëntorit 2019, i cili dëmtoi ndjeshëm infrastrukturën arsimore, gërmimet për rindërtimin e “Gjergj Kastrioti” filluan më 20/09/2023 dhe zbuluan një pasuri arkeologjike të rëndësishme në zonë. Pas këtij zbulimi, punimet u pezulluan dhe aktualisht, shkolla është e rrethuar nga barriera metalike.
Investimi për rindërtim, sipas informacioneve, mbulohet nga fondet e Bashkimit Europian dhe PNUD, me një projekt të ri të planifikuar nga arkitektin spanjoll Toni Girones, që synon të inkorporejë elemente arkeologjike. Megjithatë, gjimnazi duket se nuk do të rinovohet së shpejti, duke lënë nxënësit të vazhdojnë mësimin në klasa të mbingarkuara në shkolla të tjera të qytetit.
Një rast tjetër shqetësues është situata në Veterrik të Beratit, ku një shkollë e mëparshme është shndërruar në stallë për bagëti. Aktualisht, mësimet zhvillohen në një ndërtesë alternative, për të cilën është investuar nga TAP-i. Edhe pse shkolla ka qenë pronë e Bashkisë së Beratit, procedurat për privatizimin e saj nisën në vitin 2012, por kanë mbetur të ngrira që nga viti 2014. Në këtë mënyrë, ndonëse ndërtesa dikur shërbente për arsimin, sot ka një pronar që e ka kthyer atë në një hangar për ushqimin e bagëtive.
Kjo situatë tregon për një krizë të thellë në infrastrukturën arsimore në Shqipëri, ku shumë shkolla janë lënë jashtë funksionit, duke rrezikuar të ardhmen e brezave të rinj. Duke parë këto dy raste, është e qartë se nevojitet një angazhim më i madh nga institucionet për të rikthyer në normalitet sistemin arsimor, në mënyrë që nxënësit të kenë qasje në një arsim cilësor dhe në kushte të përshtatshme.
