Përgjatë rrugës dytësore të autostradës Levan –Tepelenë gjen tufa të mëdha me gjela deti. Fermerë të shumtë të zonës së Cakranit qëndrojnë në rrugë me shpresën se udhëtarët do të ndalojnë për të blerë ‘simbolin’ e tryezës festive.
Fermeri Xhevair Avdiaj mbarështon 300 gjela dhe pula dhe në prag të festive po i shet me 7-8 mijë lekë për kg. Po kështu dhe fermeri Xhevat Llanaj bashkë me bashkëshorten shpreson të shesë gjithë tufën deri më 31 dhjetor.
“Nuk kemi çfarë bëjmë dhe pensionin e kemi të ulët prandaj rrisim dhe këta gjela. Qeveria të interesohet për fermerin për të mos futur pula nga greku dhe çmimi te ne bie. Unë kam 120 krerë dhe i kam akoma pa shitur, çmimi ka rënë. Unë kam dy javë që po rri këtu dhe presim ndonjë makinë që të qëndrojë për të na blerë ndonjë gjel dhe kam shitur 7- 8 krerë me një çmim me 8 mijë lekë peshë e gjallë”, thotë ai.
Edhe fermeri Gezim Seitaj flet me shqetësim për çmimin e ulët të tregtisë së gjelave.
“Vitin e parë kam patur pak gjela, por më pas e rrita numrin e tyre se punë tjetër nuk bëje dot. Çmimin e shitjes e kam me 8 mijë, se dhe treg nuk ka nuk po tërhiqet. Unë kam ardhur herët ne mëngjes për t’i shitur, sot kam shitur pesë kokë, nuk qëndrojnë makinat. Për të rritur këto kane shpenzime dhe unë kam harxhuar një milion lekë misër pasi kam treqind krerë dhe i kam të gjitha bio”, shprehet Seitaj.
E njëjta panoramë është në rrugën nacionale Vlorë-Selenicë ku me dhjetëra fermerë i sheh me tufat e gjelave në pritje të blerësve. Këtu gjelat e pulat e detit shitet me 1000 deri në 1200 lekë (te reja) për kg.
Fermerëve u duhet 1 vit punë për të rritur shpendët, që më pas i shesin me mjaft mundim, duke siguruar të ardhura për familjet e tyre. Gjelat e detit janë bio sepse rriten në natyrë dhe ushqehen me drithëra.
