Kreu i Partisë Demokratike, Sali Berisha, mbajti sot fjalën e tij në aktivitetin e organizuar me rastin e 35‑vjetorit të themelimit të PD‑së, ku theksoi rolin historik të kësaj force politike në jetën demokratike të vendit.
Në fjalën e tij, Berisha u ndal te figurat themeluese të PD‑së, duke përmendur Azem Hajdarin, Gramoz Pashkon, Pjetër Arbnorin, Bujar Nishanin, Sokol Olldashin dhe Gerti Bogdanin, të cilët i cilësoi si personalitete që kanë lënë gjurmë të pashlyeshme në historinë e partisë dhe të vendit.
Berisha deklaroi se PD, që në ditën e parë të ekzistencës së saj, i dha vendit pluralizmin politik dhe kontribuoi në rrëzimin e diktaturës komuniste.
“Partisë më të jashtëzakonshme, nderimin më të madh për guximin kontributin lumenjtë e sakrificave të qindra mijëra demokratëve mbështetësve tanë. Nderim dhe mirënjohje për veprën e pavdekshme të tribunin të lirisë, krijuesit të PD-së Azem Hajdari, Azem ti je gjallë. Nderim të veçantë dhe të madhe për veprën dhe kontributin e themeluesit të shquar të PD-së.
Intelektualit të mirënjohur të pavdekshmit Gramoz Pashko. Përulem me nderim të thellë para kontributit të themeluesit Mandelës së Europës, Pjetër Arbnori, qëndrestarit të madh. Personalitetit të shquar të PD-së, burrit të shtetit që i dha nder shtetit dhe presidencës Bujar Nishanit. Ministrit brilant të PD-së, Sokol Olldashit. Udhëheqësit të rinisë Gerti Bogdani. Kujtimi i tyre do jetë krenari e jona dhe demokratëve në çdo kohë.
Të dashur miq, ne jemi nga ato më të paktat parti të planetit që kanë ndarë epoka dhe kanë bërë histori. Që në ditën e parë të themelit tonë. Jemi një parti që në ditën e parë të ekzistencës sonë i dhamë Shqipërisë dhuratën më të çmuar, pluralizmit politik. I dhamë lirinë. U themeluam si parti në vendin e lirive dhe të drejtave të ndaluar me kushtetutë. Si forca politike e vokacionit perëndimor shqiptar. Jemi partia e interesit kombëtar të shqiptar, shpallëm në themelimin tonë interesin kombëtar.
Jemi partia që në shtetin e parë ateist të botës rikthyem besimin. Arritëm të shembim diktaturën e fundit komuniste por më të egër të Europës.” – tha Berisha.
