Autoritetet belge kanë kryer të martën një sërë bastisjesh në selinë e Shërbimit të Jashtëm të Bashkimit Evropian në Bruksel, në Kolegjin e Evropës në Bruges, si dhe në disa banesa private, në kuadër të një hetimi për dyshime mbi keqpërdorimin e fondeve të BE-së.
Gjatë operacionit janë ndaluar tre persona. Mediat italiane raportojnë se mes të ndaluarve mund të jetë edhe Federica Mogherini, ish-Përfaqësuese e Lartë për Punët e Jashtme të BE-së dhe aktualisht rektore e Kolegjit të Evropës, megjithëse autoritetet nuk kanë dhënë ende konfirmim zyrtar.
Hetimet lidhen me mënyrën se si është financuar Akademia Diplomatike e BE-së dhe dyshimet për manipulim tenderësh, konflikt interesi dhe praktika korruptive në nivel të lartë brenda institucioneve evropiane.
EPPO dhe OLAF po vazhdojnë verifikimet, ndërsa deri tani nuk janë ngritur akuza zyrtare kundër personave të përfshirë.
