Një britanik, i shqetësuar nga rritja e faturës së energjisë, vendosi të blinte një pajisje matëse për të parë se sa energji konsumonte secila pajisje në shtëpinë e tij edhe kur ishte e fikur. Ai tregoi përvojën e tij në Reddit, duke thënë se ishte i bindur se karikuesi i celularit i lënë në prizë do t’i rritte ndjeshëm koston e energjisë por gaboi.
“Pinguinët në Antarktidë nuk janë në rrezik nga unë”, u shpreh ai me humor, duke nënkuptuar se karikuesi harxhonte pothuajse asgjë.
Ai theksoi se pajisjet moderne janë shumë më efikase, pasi furnizimet e energjisë kanë çelës ndezës/fikjeje dhe konsumojnë një sasi minimale kur nuk përdoren. Megjithatë, disa pajisje të vjetra mund të jenë problem.
Zbulimi më i habitshëm për të ishte mikrovala, e cila konsumonte ndjeshëm edhe kur ishte e fikur. Pas matjeve, ai vendosi ta shkëpuste nga priza sa herë që nuk e përdorte.
Por pajisja që konsumonte më shumë ishte dekoderi i televizorit Sky Q. “Nuk prisja më shumë se 9 vat”, tha ai. “Dekoderi qëndron aty duke mos bërë absolutisht asgjë dhe të dy kutitë janë në ‘eco mode’.”
Tani ai po mendon të vendosë ruterin e internetit dhe ndërprerësin ethernet në një kohëmatës. “Një kohëmatës kushton rreth 7 paund,” shpjegoi ai, “dhe do ta shlyej vetë brenda më pak se një muaji nëse pajisjet qëndrojnë të fikura për rreth tetë orë çdo ditë.”
