Një ngjarje e rëndë është regjistruar mbrëmjen e sotme në fshatin Pjezë Shijak, në Durrës, ku policia ka gjetur pa shenja jete 35-vjeçarin nga Tirana Ermal Shalliu.
Sipas informacioneve që IliriaNews.al ka siguruar, i riu është gjetur në një pemë në anë të rrugës, dyshohet i vetëvarur. Familjarët e Ermalit kishin bërë thirrje në media që një ditë më parë, duke kërkuar informacione për të afërmin e tyre.
Ata e kishin referuar rastin dhe në komisariatin numër 4 në Tiranë, duke thënë se 35-vjeçari ishte larguar në rrethana misterioze nga banesa.
Hetuesit tashmë po punojnë për të zbardhur më shumë detaje rreth kësaj ngjarje të rëndë.
Njoftimi i policisë:
Durrës/Informacion paraprak
Më datë 27.11.2024, rreth orës 19:00, në fshatin Pjezë Shijak, në një pemë në anë të rrugës është gjetur dyshohet i vetëvarur, shtetasi E. Sh., 35 vjeç, banues në Tiranë, i cili sipas familjarëve të tij dyshohet se vuante nga probleme të shëndetit mendor.
Ky shtetas ishte shpallur në kërkim nga Komisariati i Policisë Nr. 4, pasi familjarët e tij kanë kallëzuar se ishte larguar nga banesa.
Grupi hetimor ndodhet në vendngjarje dhe po punon për sqarimin e rrethanave të ngjarjes.
